Vera “nxehet” në javën e fundit, Messi e Conte presin të mësojnë të ardhmen

Vera “nxehet” në javën e fundit, Messi e Conte presin të mësojnë të ardhmen

Ju lutemi na ndihmoni qe te mirmbajme faqen vetem duke shtyypur mbi (Foton ose Videon) qe shfaqet me poshte . Faleminderit per mirkuptimin ↓↓

Me finalen e Ligës së Kampionëve mbrëmjen e sotme do të marrë fund edhe sezoni futbollistik i gjatë e i çuditshëm 2019-2020, i cili u kushtëzua shumë nga pandemia globale Covid-19, që po mban në ankth botën mbarë që prej marsit të këtij viti.

Ndërprerja për pak muaj e futbollit ka bërë që sezoni të zgjatet përtej parashikimeve dhe shumë aktivitete u ndërprenë apo anuluan, ndërsa këtë herë edhe merkatoja e verës, ndryshe nga çdo vit tjetër, do të zhvillohet në vjeshtë, pikërisht nga data 1 shtator deri më 5 tetor.

Megjithatë java e fundit e gushtit pritet të jetë më “e nxehta” e kësaj vere, duke qenë se në lojë janë e ardhmja e një legjende si Lionel Messi, që po mediton largimin nga Barcelona, por edhe ajo e një trajneri si Antonio Conte, që rrezikon t’i japë lamtumirën Interit pas vetëm një sezoni.

Ylli argjentinas është mjaft i zhgënjyer me drejtimin e klubit katalan vitet e fundit dhe gjithçka arriti kulmin me humbjen 8-2 ndaj Bayernit të Mynihut në çerekfinalen e Ligës së Kampionëve, disfatë e turpshme kjo që i vuri kapakun një sezoni pa asnjë trofe të fituar.

Pak ditë më parë Messi pati një takim me trajnerin e sapoemëruar të Barcelonës, Ronald Koeman, ku sipas mediave spanjolle i ka konfirmuar se e sheh veten më shumë jashtë sesa brenda projektit të klubit “blaugrana”.

Megjithatë pikërisht informacioni i rrjedhur në media, duket se ka thelluar edhe më tej ndarjen e Messit te Barcelonën, pasi argjentinasi mësohet të jetë shprehur se drejtuesit e klubit kanë shpërndarë qëllimisht pjesë të bisedës me Koeman, për të dhënë sinjalin te tifozët se është vetë “pleshti” që kërkon largimin.

Kjo javë pritet të jetë vendimtare për të ardhmen e Lionel Messit, pasi në ditën e parë të shtatorit Barcelona do të nisë përgatitjet për sezonin e ri dhe sigurisht që trajneri Koeman duhet ta ketë të qartë nëse do të mbështetet apo jo te ylli argjentinas.

Burime për mediat spanjolle konfirmojnë se Bartomeu është gati të largojë Messin, por me kushtin që vetë ky i fundit ta kërkojë diçka të tillë publikisht, ndaj gjatë këtyre ditëve pritet që palët të marrin edhe një vendim përfundimtar, për të qartësuar gjithçka për sezonin e ri.

Pas bujës së madhe me të cilën u zyrtarizua një vit më parë te Interi, ku mori përsipër udhëheqjen e një projekti 3-vjeçar, Antonio Conte ka prishur raportet me një pjesë të mirë të drejtuesve të klubit zikaltër dhe jo rrallë ka shpërthyer ndaj tyre në daljet mediatike.

Më e fundit ishte ajo pas finales së Ligës së Europës ndaj Sevillas, ku trajneri pranoi se e ardhmja e Interit mund të jetë edhe pa të në pankinë, ndërsa të martën është vendosur të mbahet edhe takimi që do të “vërë pikat mbi i” për të ardhmen e Contes.

Ky i fundit pritet të kërkojë më shumë autonomi dhe fuqi në vendimmarrje sa i përket merkatos, megjithatë mbetet për t’u parë pozicioni që do të mbajë presidenti 28-vjeçar Stiven Zhang, i cili nëse zgjedh të mbështesë teknikun, atëherë do të duhet të shkarkojë disa nga drejtuesit aktualë.

Edhe për këtë rast, burime për mediat italiane konfirmojnë se te Interi janë gati t’i japin duart Antonio Contes pas vetëm një sezoni, por me kushtin që trajneri të japë dorëheqjen, ose të gjendet një zgjidhje për prishjen e kontratës pa shumë pasoja.

Kjo sepse për sezonin e ardhshëm Interi ka një faturë prej rreth 12 milionë eurosh për të paguar për Luciano Spallettin dhe stafin e tij, ndaj do të ishte e rëndë të shtohej edhe një 60-milionësh tjetër për Conten dhe të besuarit e tij.

Gjithsesi përveç Achraf Hakimit, Interi nuk ka mbyllur asnjë operacion merkatoje, ndonëse ka “në dorë” disa futbollistë që presin me interes zhvillimet në klubin zikaltër. Vendimi mbi të ardhmen e Contes, do t’i hapte rrugë edhe merkatos në klubi zikaltër, që do të zhvillohet mbi bazën e kërkesave të trajnerit që do të ulet në pankinë.

Gjithsesi qëndrojnë apo jo Messi dhe Conte në skuadrat përkatëse, është e sigurt që çfarëdo vendimi që të marrin ata, do të ndikojë jo pak në merkaton e kësaj vere, ndaj trajnerë e futbollistë presin me interes zhvillimet në aksin Milano-Barcelonë.